攬炒派大隻講，議會內不作為

港平

近日政府喺立法會動議委任張舉能為終審法院首席法官，民主黨「自回歸首次對任命動議投棄權票」，同樣投棄權票嘅，仲有公民黨一眾議員、邵家臻同張超雄。

一個動議，正常立法會議員都有立場，民主黨、公民黨係咪已經覺得無人影響到佢哋「地位」，點都可以繼續安安穩穩享受議員嘅高薪厚祿，所以連票都唔駛投呢？佢哋咁做，又「對得住」喺議會外抗爭嘅「手足」咩？

個中原因，就係因為網上以至攬炒派之間一直有傳言，稱張舉能個人較為「建制」，所以呢，今次就有攬炒派投反對票，怕事嘅民主黨同公民黨就棄權，擺明喺度「擦邊球」，如果佢哋投贊成票，咁一定會得失要求「法官要夠黃」嘅支持者；如果投反對票呢，又怕俾人話佢哋想反對司法界嘅決定，所以就投棄權票或者唔出席會議。

仲有唔夠三個月就係立法會換屆選舉，若果民主黨、公民黨呢啲政客可以順利連任，佢哋可能會更加畏手畏尾，一「有事」就唔投票，最多最多，開完會行出嚟同記者講，「今日係香港民主最黑暗嘅一日」，不過黑暗之處，唔係因為政府依法辦事，而係「民主派」為保高薪厚職竟然不作為，真係「好黑暗」！