今個星期新版iPhone登場後(有傳叫 iPhone 11 同iPhone 11 Pro),為趕及年尾消費旺季的旗艦手機都悉數現身。去年忍手未換手機的朋友,又應否在年尾入手新版旗艦機呢? 先講iPhone友的抉擇,按現時流出大量新iPhone資料睇,即使係高端Pro版,最大的「改良」只係多了一夥超廣角鏡頭,還有提升夜拍功能。如果你已用緊雙鏡版iPhone,要拍超廣角風景,加多一個外置廣角鏡便成事。至於夜拍功能,又未必經常用得著,在缺乏殺手級新功能前提下,如果你用緊的iPhone仍然無病無痛,似乎未必急切需要換新機。 iPhone友另一忍手考量,係傳聞今年新版iPhone仍未有5G版,最快都要明年,明年的iPhone還會加入不少用家期待已久,隱藏在屏幕下的指紋辯識鍵。加上服務收入現已成為蘋果重要水源,現階段蘋果仍會想辦法留住使用近幾年版本iPhone用家,所以iPhone用家有充足條件繼續用新不如用熟。
至於Android友,無疑不少大廠已推出5G版手機,但趕在年尾入手5G旗艦機,並不等如你可以早買早享受5G服務。皆因本地5G頻譜於今年10月才舉行拍賣,連一向進取的數碼通亦表示預計到明年下半年才會推出5G服務。而且這類新服務通常初推出時定價都相當離地,至少要再等半年月費才可望回到合理水平。既然現實情況係有機無頻譜,又何苦為了虛榮而急急入手有5G之名而無5G之實的旗艦機。 選擇唔換機,除了以上客觀理由,最實際的理由係未來一年香港經濟唔知有幾凍,還是留多個換機錢暖一暖荷包吧。
|